Заман талабына сай роботехниканың тілін меңгеріп, түрлі механизмдерді құрастырып, ел тұрмысына қажетті жаңа роботты ойластырып табуды алдына мақсат етіп қойған Иманғали Құрбанұлы 2005 жылдың 18 мамырында Оңтүстік Қазақстан облысы, Мақтаарал ауданында дүниеге келді. Ойы ұшқыр, ойлау шеңбері кең, бірнеше тілді еркін меңгерген, ғылымға деген құлшынысы күшті оқушылардың бірі деп Иманғалиді айта алар едік. Кішкентайынан қатарының алды болып, өзіне ұнаған затты ұстап көріп, зерттеуге әуес дарын, ақ алтынды алқапта бақытты балалығын өткізіп, Г.Титов атындағы №25 орта мектептің табалдырығын аттады. Ғылымның кілті қолына оңай түспейтінін біліп, оқудан, ізденуден, еңбектенуден жалықпайтын, талантты жас бүгінде Нұр-Сұлтан қаласындағы Ж.Жабаев атындағы №4 мектеп-гимназиясында оқиды. Әдептілігі кісі қызығарлықтай, қолына түскен қандай істі де шыр айналдырып алып кететін еңбексүйгіш оқушы бастауыш сыныптарда бастап-ақ озат оқушылардың қатарынан түспеді. Сыныпішілік өткізілген пән сайыстары мен қоғамдық іс-шараларда ұстаздың көзіне түсіп, әрдайым үйге алғыс арқалап келеді. Қабілетін ұштай білген алғашқы ұстазы, сынып жетекшісі Меруерт апайы болатын. «Ұстазы мықтының ұстамы мықты» деген, білімді де білікті, тәжірибелі ұстаздары Забира, Сусар апайларының тәлімдік етуімен білім баспалдағымен өрлеп келеді. Иманғалидың қызығып, жаны қалап, айналысатын сүйікті ісі – робототехника. Осы салаға деген құштарлығы №4 мектеп-гиназиясына келгенде тіптен күшейіп, ғылым дейтін тылсым әлемге тартылып, білім мен ғылым тұңғиығына сүңгіп кетті. Ал, бүгін түрлі додалар мен үлкен сайыстарда, жеңіс тұғырынан көрініп келеді. Осы еңбегі үшін сынып жетекшісі Омаров Мақсат ағайына деген айтар алғысы шексіз.       Жетістігі: 2013 жылы сыныпішілік өткізілген «Озық ойлы оқушы» зияткерлік сайысында «Үздік оқушы» аталымы бойынша Мадақтама иемденген. 2016 жылы «Инфоурок» жобасы аясында интернет арқылы қашықтықтан өткізілген «Зима – 2015/2016» олимпиадасынан математика пәні бойынша және 2018 жылы 16-18 мамыр күндері оқушылар арасында өткізілген «Kazаkhstan Robotic Challenge – 2018» атты РРеспубликалық робототехника сайысында көрсеткен ерекше өнертапқыштығы мен конструкторлық идеясы үшін I орын жеңімпазы атанды. 2019 жылы жалпы білім беретін пәндер бойынша мектеп оқушыларының Республикалық олимпиадасының  (мектепішілік) І кезеңінде қазақстан тарихы пәнінен жүлделі I орынды иеленгені үшін Мадақтама иемденіп, 2019 жылы «RoboZerde – 2019» қалалық робо-фестивалінде «Лабиринт» санаты бойынша I дәрежелі Диплом иегері атанды.
      Сүйікті ісі: Кітап оқу, робототехника жасау, түрлі механикалық құрылғыларды құрастыру.
      Арманы: Жоғары білім алу, болашақта инженер-технолог болу.